Міністр аховы здароўя Саудаўскай Аравіі Фахд бен Абдэль Рахман Аль-Джаляджэль паведаміў, што падчас хаджу загінуў 1301 паломнік. У 83% з іх не было адпаведнай візы, таму ім давялося пераадолець вялікія адлегласці без магчымасці схавацца ад сонца. Памерлыя пахаваныя ў Мецы, перадае Associated Press.
Сярод загінулых — 660 егіпцян. Толькі 31 з іх меў права знаходзіцца ў краіне. Егіпет адклікаў ліцэнзіі 16 турагенцтваў, якія дапамагалі паломнікам несанкцыянавана заехаць у Саудаўскую Аравію. Сярод загінулых таксама 165 чалавек з Інданезіі, 98 — з Індыі і дзясяткі з Іярданіі, Туніса, Марока, Алжыра і Малайзіі. У большасці выпадках смерць наступіла ад фізічнага знясілення і абязводжвання на фоне экстрэмальнай спякоты.
Працэс апазнання загінулых зацягнуўся, бо ў многіх пры сабе не было дакументаў.
Яшчэ 95 паломнікаў знаходзяцца ў бальніцах.
Міністэрства аховы здароўя Саудаўскай Аравіі рэкамендавала паломнікам хавацца ад сонца, піць шмат вады і па магчымасці заставацца пад дахам у самыя гарачыя гадзіны. Аднак многія рытуалы хаджу, такія як абыход вакол святога каменя Каабы ў Мецы і абавязковае ўзыходжанне на гару Арафат, патрабуюць ад мусульман знаходжання днём пад пякучым сонцам. Тое, што многія паломнікі прыбылі на хадж нелегальна, без адпаведных дазволаў, таксама моцна абмяжоўвала іх доступ да медыцынскай дапамогі.
Нагадаем, раней паведамлялася пра больш чым 1000 загінулых у выніку паломніцтва ў Меку.
Хадж — паломніцтва мусульман у Меку. Сёлета хадж праходзіў з 14 да 19 чэрвеня. Тэмпература паветра ў Мецы ў гэтыя дні дасягала 52 °C. Паводле звестак уладаў Саудаўскай Аравіі, сёлета паломніцтва ў Меку здзейсніла 1,83 млн чалавек, з іх больш за 1,6 млн — замежнікі.