Украінскія дыверсанты спрабавалі захапіць расійскія памежныя населеныя пункты, але панеслі вялікія страты. Пра гэта на калегіі Мінабароны Расіі заявіў кіраўнік ведамства Сяргей Шайгу.
Паводле расійскага міністра абароны, мэтай дыверсійных груп былі населеныя пункты ў Белгародскай і Курскай абласцях.
«Найбольш актыўныя дзеянні вяліся ў раёне населенага пункта Козінка. Усе атакі праціўніка былі паспяхова адбітыя, ён адкінуты за межы расійскай тэрыторыі. Пры гэтым страты УСУ на кірунку дзеянняў груповак прыкрыцця дзяржмяжы за восем сутак баявых дзеянняў склалі больш за 3,5 тысячы, а дакладней 3501 чалавек, з іх 790 — незваротныя страты. Знішчаныя 23 танкі, 34 адзінкі бранятэхнікі, у тым ліку 11 „Брэдлі“, пяць пускавых установак рэактыўнай сістэмы залпавага агню „Вампір“, верталёт Мі-8», — заявіў Шайгу.
Нагадаем, раней Міністэрства абароны Расіі неаднаразова заяўляла, што не дапусціла парушэння дзяржаўнай мяжы Расіі.
Пра свой заход на тэрыторыю Расіі раніцай 12 сакавіка заявілі Рускі добраахвотніцкі корпус, легіён «Свабода Расіі» і Сібірскі батальён, якія ваююць за Украіну. Пазней з’явілася інфармацыя, што рэйд падтрымалі добраахвотнікі Чачэнскай Рэспублікі Ічкерыя.
Прэзідэнт РФ напярэдадні на калегіі ФСБ запатрабаваў «выявіць пайменна» ўсіх «здраднікаў», якія ваююць на баку Украіны, заявіўшы, што іх будуць караць «без тэрміну даўнасці, дзе б яны ні знаходзіліся».