Украінскія фатографы Улада і Канстанцін Ліберавы апублікавалі ў сваім Instagram-акаўнце фота байцоў УСУ, якія ваююць у Данецкай вобласці. Здымкі былі зробленыя на перадавой, куды рэпарцёры прыехалі разам з пяхотай.
— Твары тых, хто ідзе на штурм, ведаючы, што можа не вярнуцца. І твары тых, хто выходзіць з пекла, разумеючы, што цяпер яно навекі з імі. За кожнай адбітай пасадкай, за кожным адбітым бліндажом і міліметрам зямлі — кроў нашых людзей. За паўтара года вайны гэтыя словы амаль ніхто не ўспрымае, яны гучаць як проста банальнасць. Але тваё стаўленне рэзка мяняецца, калі ты стаіш перад гэтымі людзьмі і глядзіш ім проста ў вочы. Адчуваеш увесь той боль і страх, які, здаецца, проста немагчыма апанаваць, але яны яго пераадолелі. І пераадольваюць кожны дзень, — расказалі фатографы пра герояў свайго рэпартажу.
Украінскія фотарэпарцёры заязджаюць на пазіцыі на лініі фронту разам з пяхотай. Дзейнічаць трэба хутка, пакуль не пачаўся абстрэл, — выгрузіць боекамплект і правізію, забраць параненых і забітых.
Потым вяртанне з медэвакуацыйнай брыгадай і словы цяжка кантужанага ўкраінскага байца, які яшчэ сорак хвілін таму быў у самым пекле і не верыў, што выйдзе адтуль жывым: «Яны кажуць быць нармальнымі. Як пасля такога будзеш нармальным?»
— Едуць усе разам. І мёртвыя, і жывыя, у цесным кузаве. Галава загінулага хлопца ўсю дарогу б’ецца аб маю руку. Гэта ўсяго адзін дзень, адзін маленькі эпізод, — напісалі Ліберавы.
