Пасля выхаду новага цалкам беларускамоўнага альбома «Суперпазіцыя», на гурт «Петля Пристрастия» абрынулася хваля хэйта. Прычым пераважна з боку рускамоўнай публікі. У сацсетцы «ВКонтакте» ў адрас калектыву пасыпаліся абразы і папрокі ў тым, што яны «предали часть своих слушателей», пераклаўшы тэксты песен гурта на «язык, которые по сути понимают полтора человека». На спантаннай сустэчы з прыхільнікамі саліст гурта Ілля Чарапко-Самахвалаў адказаў на крытыку, піша Reform.
— Я не збіраюся апраўдвацца перад жыхарамі іншай краіны за тую мову, якую выкарыстоўваю, з’яўляючыся грамадзянінам Рэспублікі Беларусь, — заявіў Ілля.
Як піша выданне, музыкант быў шчыра здзіўлены і абураны такой рэакцыяй ад часткі рускамоўнай аўдыторыі.
— Не разумею, адкуль карані гэтай пагарды да беларускай мовы? Мы ні ў каго не павінны пытаць дазволу. Мы беларускі гурт, і гэта наша поўнае права! А калі б мы заспявалі на англійскай мове? Ці назіраўся б такі хейт?! Я ўпэўнены, што не. Але ў дачыненні да беларускай мовы такое дапускаецца! — пракаментаваў ён сітуацыю. — Калі мы ствараем нешта, то робім гэта, сыходзячы з нашага ўнутранага жадання. Для нас гэта не кан’юктура, а ўнутранае памкненне як творчых адзінак. Калі мы захочам зрабіць альбом на рускай мове, мы яго зробім. Зараз мы палічылі важным стварыць альбом на беларускай мове. Мы грамадзяне Рэспублікі Беларусі, а не Расійскай Федэрацыі, паўтаруся. Вось і адказ на ўсе пытанні.
Прыклады негатыўных каментароў, якія пакідалі людзі пад рэлізам гурта (арфаграфія аўтараў):
- Это они так свое решительное «фи» русскому языку высказывают (для «просвещенных» людей — это теперь «язык оккупантов» и прочая шиза по списку). На заработок денег с яндекса данная акция не распространяется.
- Ребята, я все понимаю, но Русский народ Вас тоже любит, тоже хочет слушать, быть на концертах, может быть не стоит так категорично менять все? Я ждал альбом новый пипец как, но честно, не понимаю почти ничего (
- Как жаль, что теперь большинство слушателей не могут понять ваших песен без переводчика.
Ілля спадзяецца, што большасць расійскіх слухачоў гурта «Петля Пристрастия» ўсё ж мае іншую пазіцыю, чым хейтары з «ВКонтакте». Тых, хто адпісаўся, музыка назваў «шавіністамі» і дадаў, што адсутнасці такіх людзей гурт толькі рады.
Паслухаць новы альбом «Суперпазіцыя» можна тут.