Другая ракетка свету Арына Сабаленка 21 сакавіка апублікавала ў Instagram пост, прысвечаны трагічнай гібелі ў ЗША былога хакеіста зборнай Беларусі Канстанціна Кальцова. У ім яна расказала, што яны «больш не былі разам».
«Смерць Косці — нечуваная трагедыя. І хоць мы больш не былі разам, маё сэрца разбітае. Калі ласка, паважайце маё асабістае жыццё і асабістае жыццё яго сям'і ў гэты цяжкі час», — напісала тэнісістка на англійскай і рускай мовах. Гэта яе першы пост пасля гібелі Кальцова.
Нагадаем, экс-хакеіст зборнай Беларусі Канстанцін Кальцоў загінуў ва ўзросце 42 гадоў. Трагедыя адбылася ў гатэлі ў Маямі, дзе спыняўся спартовец. 19 сакавіка паліцыя Маямі выпусціла з гэтай нагоды афіцыйнае паведамленне:
«Паводле звестак следства, у панядзелак, 18 сакавіка 2024 года, прыкладна ў 12.39 паліцыя і пажарныя ратавальнікі Бал-Харбара былі скіраваныя ў гатэль St. Regis Bal Harbour Resort, 9703 Collins Avenue, з нагоды мужчыны, які саскочыў з балкона. Аддзел забойстваў паліцыі акругі Маямі-Дэйд узяў на сябе расследаванне меркаванага самагубства Канстанціна Кальцова (04/17/1981). Ніякіх падазроных абставінаў не выяўлена».
Былая жонка Кальцова Юлія Міхайлава ў інтэрв'ю «Люстэрку» выказала ўпэўненасць, што гэта быў няшчасны выпадак: «У Канстанціна былі далей зарэзерваваныя апартаменты ў іншым месцы. Былі аплачаныя пакупкі, якія яшчэ не прыйшлі. Надоўга арандаваная машына. То-бок ён не збіраўся паміраць. Усякае, вядома, можа ў галаву стрэльнуць, але трагедыі нічога не прадказвала».
22 сакавіка Сабаленка правядзе першы матч у Маямі на турніры катэгорыі WTA-1000.
Чытайце таксама
