Беларускія ВНУ штогод адлічваюць каля 8000 студэнтаў, палова з іх сыходзіць па ўласным жаданні. Пра гэта на савеце рэктараў далажыў міністр адукацыі Андрэй Іванец, перадае БЕЛТА. Лукашэнка ў адказ на гэта пацікавіўся, як яны туды наогул трапілі.
«Штогод каля 8 тысяч студэнтаў мы адлічваем з ВНУ, палову з іх — за непаспяховасць (мы вітаем жорсткія патрабаванні да якасці адукацыі), але палову — па ўласным жаданні. І гэта сведчыць, што з прафарыентацыяй мы істотным чынам недапрацоўваем. І гэта — нерэалізаваны патэнцыял для эканомікі нашай краіны», — сказаў ён.
У адказ на гэта Лукашэнка заявіў, што добра, «што вы не трымаеце гультаёў і выпадковых людзей».
«Але 8 тысяч — гэта нямала. Значыць, можа, мы дзесьці недапрацавалі. Як праскочылі ў ВНУ гэтыя людзі? — пацікавіўся Лукашэнка. — Калі мы нешта няправільна зрабілі ў моманце ўступных экзаменаў, давайце адмовімся ад чагосьці, давайце наогул гэта перакрэслім і вернемся да таго, што было. Але трэба яшчэ раз паглядзець, шчыра і сумленна. Добрыя ўступныя экзамены, якасць студэнтаў расце — значыць, прынялі тых, каго трэба. Дрэнныя — давайце вяртайце, давайце падумаем, што яшчэ трэба зрабіць».
Іванец таксама расказаў, што цяпер палова выпускнікоў 9-х класаў ідзе ў каледжы. Раней такіх было 30%.
«Фактычна кожны другі выпускнік дзявятага класа выбірае траекторыю атрымання адукацыі ў каледжы. Мы не закрываем дарогі ў вышэйшую адукацыю. Ствараем адпаведныя дадатковыя траекторыі — толькі летась ВНУ прынялі 10 тысяч выпускнікоў каледжаў», — растлумачыў Іванец.