Жыхары Гомеля яшчэ ў снежні пачалі заўважаць грузавікі, якія перавозяць супрацьтанкавыя бетонныя піраміды, пра гэта паведамляў тэлеграм-канал «Беларускі Гаюн». У суботу цягач з пірамідамі зноў бачылі ў Гомелі, фота апублікавала мясцовае незалежнае выданне «Флагшток». Пазней яго журналісты здолелі высветліць месцазнаходжанне адной з імаверных пляцовак, дзе вырабляюць гэтыя ўмацаванні.
Жалезабетонныя піраміды вышынёй 90−120 см, так званыя «зубы цмока», цяпер у вялікай колькасці выкарыстоўваюць улады і войскі РФ для стварэння ліній абароны паблізу мяжы з Украінай у Белгародскай вобласці і на акупаваных украінскіх тэрыторыях — іх заўважалі ў Крыме, у раёне Марыупаля і Мелітопаля. Такія ўмацаванні будуе і ПВК Вагнера ў Луганскай вобласці — і называе іх «лініяй Вагнера».
Грузавік з пірамідамі, які бачылі ў Гомелі 21 студзеня, рухаўся на выездзе з горада ва ўсходнім кірунку.
Як адзначае тэлеграм-канал «МотолькоПомоги», у астатніх выпадках гамельчукі таксама бачылі «зубы цмока» на такіх грузавіках-даўгамерах, звычайна маркі «КамАЗ», як з беларускімі, так і з расійскімі нумарамі. На платформе змяшчаецца 15−20 пірамід. Паводле інфармацыі канала, умацаванні ўжо больш за месяц вырабляе Гомельскі завод жалезабетонных вырабаў і пастаўляе ў Расію, і гэта не адзінае такое прадпрыемства ў Беларусі.
Журналісты «Флагштока» праверылі сайты абвестак і на расійскім «Авіта» знайшлі размешчаную ў снежні абвестку ад прыватнай асобы, у якой прапаноўваліся на продаж бетонныя тэтраэдры, вырабленыя ў Гомелі. Аўтар абвесткі не падаў назву вытворчасці, але адзначыў, што там выпускаюць да 100 «зубоў цмока» ў дзень.
Да абвесткі былі далучаныя фота з пірамідамі на месцы іх вытворчасці. Па некаторых аб’ектах на гэтых здымках журналісты змаглі вызначыць, што пляцоўка знаходзіцца ў гомельскай прамзоне па вуліцы Барыкіна на тэрыторыі Гомельскага завода гандлёвага абсталявання. Сам ён вырабы з бетону не робіць, але здае свае плошчы ў арэнду і распрадае нерухомасць.
«Флагшток» удакладняе, што пашукаў у адкрытых базах звесткі пра арганізацыі, якія зарэгістраваныя па адрасе завода і займаюцца бетоннымі вырабамі. Знайшлася толькі адна — прыватная фірма ПВУП «БетонСтройСнаб», але яна з лістапада знаходзіцца ў стадыі ліквідацыі.
Дапоўнена ў 21.45. Пасля публікацыі «Люстэрка» атрымала інфармацыю пра тое, што вытворчасцю «зубоў цмока» з канца 2022 года таксама займаецца ААТ «Бабруйскі завод буйнапанэльнага домабудавання». Інфармацыя паступіла з адной крыніцы і пакуль што дадаткова не пацверджаная. Калі вы можаце пацвердзіць гэта ці ведаеце, якія яшчэ прадпрыемствы Беларусі вырабляюць супрацьтанкавыя піраміды, паведаміць пра гэта можна ў бот сувязі з рэдакцыяй.