Днямі ў тэлеграм-канале палка Каліноўскага з’явілася інфармацыя, што ў склад фаміравання ўвайшла каманда аэраразведкі падраздзялення «Пагоня». Чаму так сталася і ці азначае гэта новы раскол сярод беларускіх добраахвотнікаў? Запыталі ў прэс-службы.
Колькі байцоў далучылася да каліноўцаў, у «Пагоні» не паведамляюць. Тлумачаць, што не могуць агучыць такія дадзеныя з меркаванняў бяспекі. Пры гэтым удакладняюць: ніякага расколу ў падраздзяленні няма. Аб’яднанне адбылося ў рамках супрацоўніцтва і па агульнай дамоўленасці.
— Беларусы, якія ваююць ва Украіне, маюць паміж сабой кантакты, яны супрацоўнічаюць і робяць адзіную справу разам, — гавораць у прэс-службе. — Каманда аэраразведкі пайшла да каліноўцаў, таму што нашым хлопцам трэба пераняць досвед і атрымаць найлепшыя ўмовы для выканання баявых задач. Там яны і вучацца, і ваююць. Гэта ж датычыць і часткі байцоў «Пагоні», якія цяпер знаходзяцца ў батальёне «Тэрор».
На пытанне, ці значыць гэта, што пасля аэраразведка зноў вернецца ў склад «Пагоні», у прэс-службе адказалі так:
— Яны пайшлі туды, каб навучыцца, а далей баявыя дзеянні пакажуць, вернуцца яны да нас, сфарміруюць дадатковую мабільную групу ці нешта яшчэ. Такія моманты мы не можам раскрываць, бо гэта ўплывае на бяспеку нашых хлопцаў.
Інфармацыю «Нашай нівы» пра тое, што добраахвотнікі, якія ўваходзяць у склад аэраразведкі «Пагоні», пэўны час трэніраваліся за мяжой, а калі прыехалі ва Украіну, праз юрыдычныя пытанні не змаглі далучыцца да «Пагоні», але іх удалося прыняць да сябе каліноўцам, у прэс-службе каментаваць не сталі. Аднак ўдакладнілі: «Так, кантракты, што заключалі з байцамі аб прыёме на службу, таксама адыгралі сваю ролю».
— Ці з’яўляецца тое, што ваша аэраразведка ўвайшла ў склад каліноўцаў, паказчыкам таго, што «Пагоня» і полк Каліноўскага могуць аб’яднацца?
— Цяпер гэта супрацоўніцтва, а аб’яднаемся мы ці не, будзе залежаць ад такого, як працягнуць развівацца ваенныя дзеянні. Усё залежыць ад украінскага боку, палітычнай павесткі і дзеянняў, якія ідуць у Беларусі. Агулам мы ўсе разумеем, што мы будзем плячо да пляча весці баявыя дзеянні на тэрыторыі Беларусі.
Нагадаем, раней у інтэрв'ю «Зеркалу» камандзір палка Каліноўскага Дзяніс Кіт дапускаў, што падраздзяленне можа аказацца ў Беларусі.
— Наш план максімум — свабодная Беларусь праз свабодную Украіну, — тлумачыў камандзір. — Пасля вайны ва Украіне мы хочам падрыхтавацца, абвясціць мабілізацыю і выканаць праграму максімум. Магчыма, нам не давядзецца ехаць у Беларусь на танках. Можа, усё вырашыцца само сабой. Хацелася б, каб было максімальна без шуму. Спадзяюся, народ Беларусі ўбачыць у нас моц і надзею. А таксама сур’ёзнага канкурэнта ўладзе.
