Еўропа гатовая значна павялічыць свае выдаткі на абарону з улікам кароткатэрміновай неабходнасці падтрымліваць Украіну, але таксама доўгатэрміновай патрэбы гарантаваць уласную бяспеку, заявіла кіраўніца Еўракамісіі (ЕК) Урсула фон дэр Ляен.
Яна паведаміла, што напярэдадні пазачарговага саміту ЕС 6 сакавіка разаслала ліст краінам Еўрасаюза, дзе патлумачыла свой план ReArm Europe («Пераўзброіць Еўропу»), які ёсць «серыяй прапановаў, скіраваных на выкарыстанне ўсіх наяўных у распараджэнні фінансавых рычагоў, каб дапамагчы дзяржавам-сябрам хутка павялічыць выдаткі і ўзмацніць свой абаронны патэнцыял у кароткатэрміновым парадку ўжо цяпер, але таксама і на даўжэйшы час цягам гэтага дзесяцігоддзя».
План складаецца з пяці частак.
У прыватнасці, прапануецца даць 150 млрд еўра пазык дзяржавам-сябрам для інвестыцый у абарону. Гэта разлічана на эфектыўнейшае і сумеснае расходаванне сродкаў. Гаворка ідзе пра ўмацаванне патэнцыялаў на такіх напрамках, як супрацьпаветраная і супрацьракетная абарона, артылерыйскія сістэмы, ракеты і боепрыпасы, беспілотнікі і сістэмы барацьбы з імі, кібербяспека, вайсковая мабільнасць.
«Гэта дапаможа дзяржавам-сябрам аб’яднаць попыт і закупляць разам. Вядома, з гэтым абсталяваннем дзяржавы-сябры могуць значна ўзмацніць сваю падтрымку Украіны. <…> Такі падыход сумесных закупак таксама скароціць выдаткі, зменшыць фрагментацыю, павысіць аператыўную сумяшчальнасць і ўмацуе нашую абаронна-прамысловую базу. І гэта можа быць на карысць Украіне», — патлумачыла фон дэр Ляен.
Будзе таксама прапанавана актываваць нацыянальнае выключэнне з правілаў бюджэтнай дысцыпліны — «пакта стабільнасці і росту», што дазволіць дзяржавам-сябрам значна павялічыць свае выдаткі на абарону, не запускаючы працэдуры празмернага дэфіцыту. Паводле кіраўніцы ЕК, калі дзяржавы-сябры павялічаць свае выдаткі на абарону ў сярэднім на 1,5% ВУП, гэта можа стварыць фіскальную прастору ў памеры каля 650 млрд еўра за перыяд у чатыры гады.
План таксама змяшчае прапановы па выкарыстанні магчымасцяў бюджэту ЕС і прыцягненні прыватных капіталаў.
«Еўропа гатовая ўзяць на сябе свае абавязанні. ReArm Europe можа мабілізаваць каля 800 млрд еўра для бяспечнай і ўстойлівай Еўропы. Мы працягнем цесна супрацоўнічаць з нашымі партнёрамі ў NATO. Гэта важны момант для Еўропы. І мы гатовыя перайсці да дзеяння», — заключыла фон дэр Ляен.