Арганізацыя Аб’яднаных Нацый скіравала беларускаму ўраду ліст з абвінавачаннямі. Пра гэта, адказваючы на пытанне «Люстэрка» на прэс-канферэнцыі ў Вільнюсе, паведаміў спецыяльны дакладчык ААН па правах чалавека ў Беларусі Нілс Муйжніекс. Дакумент датычыць парушэнняў падчас правядзення завочных судоў. Муйжніекс таксама даў ацэнку блізкім прэзідэнцкім выбарам у Беларусі.
Як расказаў Нілс Муйжніекс, з моманту яго прызначэння на пасаду спецыяльнага дакладчыка па правах чалавека ў Беларусі ў кастрычніку 2024 года, Арганізацыя Аб’яднаных Нацый скіравала ва ўрад нашай краіны некалькі запытаў. Самы важны з іх, на думку чыноўніка, датычыў правядзення завочных судоў.
— Мы скіравалі так званы ліст з абвінавачаннямі — гэта спецыяльны тэрмін ААН, які абазначае падрабязны зварот наконт меркаваных парушэнняў правоў чалавека, — паведаміў Нілс Муйжніекс. — Нашыя пытанні датычылі доступу палітвязняў да адвакатаў, прэзумпцыі невінаватасці, роўнасці бакоў у судах і доступу да інфармацыі для абвінавачаных. У гэтым дакуменце з 15−20 старонак, які падпісалі таксама мае калегі, іншыя спецдакладчыкі, мы паднялі шэраг пытанняў, якія выклікаюць нашую занепакоенасць у сувязі з правядзеннем завочных судоў.
Спецдакладчык таксама паведаміў, што ў лісце пералічаныя імёны 15 чалавек, якіх ААН лічыць пацярпелымі ад парушэнняў падчас правядзення завочных судоў. Іх імёнаў ён не назваў, а таксама не агучыў сутнасць выстаўленых абвінавачанняў. Паводле яго, цяпер ААН чакае адказу ад беларускіх уладаў, які будзе апублікаваны ў сярэдзіне лютага 2025 года.
Акрамя таго, на прэс-канферэнцыі Нілс Муйжніекс даў ацэнку прэзідэнцкім выбарам, якія пройдуць у Беларусі 26 студзеня.
— Тое, што адбудзецца ў нядзелю, не будзе свабодным і справядлівым, — заявіў спецдакладчык ААН. — У атмасферы страху і рэпрэсій цяжка, а можа, і немагчыма праводзіць выбары.
Спецыяльны дакладчык ААН — пасада, якая займае важнае месца ў барацьбе за правы чалавека ў Беларусі. Эксперт праводзіць незалежны маніторынг таго, што адбываецца з правамі чалавека ў нашай краіне, рэгулярна рыхтуе рэкамендацыі па паляпшэнні сітуацыі. Акрамя таго, ён адсочвае выкананне міжнародных абавязанняў Рэспублікі Беларусь у сферы павагі і захавання правоў чалавека.
Чытайце таксама
