Расіянка апублікавала ў TikTok відэа, дзе абурылася тым, што ў Беларусі прадаюць машыны LADA танней, чым у Расіі — краіне-вытворцы гэтых аўтамабіляў. У каментарах беларусы нагадалі, што і некаторыя беларускія тавары ў суседняй дзяржаве могуць каштаваць танней. На ролік звярнуў увагу Telegraf.news.
Са словаў жанчыны, аўтамабіль LADA Vesta SW у Беларусі прадаюць прыкладна на 1000 даляраў танней.
«Растлумачце мне, як, нах**н, такое адбываецца? У нас у Расіі [аўтамабіляў] LADA Vesta SW няма. Ты едзеш у суседнюю краіну (Беларусь. — Заўв. рэд.) для таго, каб узяць машыну на 126 000 [расійскіх рублёў, больш за 1100 даляраў] танней, чым адзіны аўтамабіль, які ў мяне была магчымасць урваць у „Гермесе“ ["Аўтагермес», афіцыйны дылер LADA ў Маскве]", — паскардзілася расіянка.
Яна сцвярджае, што ў іншых дылераў «яшчэ даражэй».
Як адзначае партал, на афіцыйным сайце Lada мадэлі Vesta SW каштуюць прыкладна ад 55 тысяч беларускіх рублёў (ад 1 655 000 расійскіх рублёў, або 15 тысяч даляраў). А на сайце мінскага дылера — ад 44 500 беларускіх рублёў (прыкладна ад 1 351 000 расійскіх рублёў, або 12 тысяч даляраў).
«Растлумачце мне, як гэта працуе?» — абурылася жанчына.
У каментарах беларусы нагадалі, што пэўная беларуская прадукцыя ў Расіі таксама таннейшая.
«Гэтак жа, як і беларуская прадукцыя ў Расіі на траціну таннейшая, чым у Беларусі, жыву на мяжы, маю магчымасць параўнаць», — напісала адна з карыстальніц TikTok пад відэа.
«У Беларусі тое самае. Я МТЗ 80.2 купіў у Расіі на 4 тысячы ўмоўных адзінак лепш», — напісаў іншы чалавек.
«Гэта ж экспарт і імпарт. Як і беларускія тавары ў іншых краінах танней купіць, чым на радзіме. Лядоўня ў Мінску каштуе даражэй, чым у Маскве з дастаўкай…» — заявіў трэці.
«У вас хутка разбіраюцца, у нас не спяшаюцца», — дапусціў чацвёрты.
Чытайце таксама
