З 22 да 27 верасня ў Нью-Ёрку праходзіць 79-я сесія Генеральнай Асамблеі ААН. У мерапрыемстве ўзяла ўдзел лідарка дэмакратычных сіл Беларусі Святлана Ціханоўская. Афіцыйны Мінск прадстаўлялі чальцы Савета Рэспублікі — экс-кіраўнік МЗС Сяргей Алейнік і былы міністр юстыцыі Сяргей Хаменка. «Люстэрка» вырашыла даведацца, ці перасякаліся падчас Генасамблеі дарогі дзвюх дэлегацый. Расказваем, ці ўдалося ім пагаварыць.
Дарогі дэмакратычнай лідаркі Беларусі і чальцоў верхняй палаты беларускага парламента на Генасамблеі перасякаліся некалькі разоў, расказаў дыпламатычны дарадца Святланы Ціханоўскай Дзяніс Кучынскі.
— На кантакт дэлегацыя Лукашэнкі не пайшла, хоць мы і былі адкрытыя для гэтага, — расказаў «Люстэрку» Кучынскі. — Апошні раз мы бачыліся, калі яны (Алейнік і Хаменка. — Заўв. рэд.) спускаліся эскалатарам, а Святлана Ціханоўская падымалася. Размінуцца было немагчыма.
Як кажа Кучынскі, Ціханоўская павітала афіцыйных беларускіх парламентарыяў.
— Святлана сказала ім «Жыве Беларусь!», а яны ў адказ ухмыльнуліся, адвярнуліся і паехалі далей уніз, — са смехам кажа Кучынскі.
Афіцыйны тэлеграм-канал Святланы Ціханоўскай піша, што падчас Генеральнай Асамблеі ААН палітык сустрэлася з лідарамі і кіраўнікамі МЗС больш чым 40 краін.
Пра дыпламатычныя поспехі прадстаўнікоў афіцыйнага Мінска вядома мала — дзяржаўнае тэлебачанне толькі паведаміла пра выступ з афіцыйнай трыбуны ААН намесніка старшыні Савета Рэспублікі Сяргея Хаменкі.
Чытайце таксама
