Брытанская банкаўская група HSBC (Hongkong and Shanghai Banking Corporation) у кастрычніку перастане ажыццяўляць грашовыя пераводы ў Беларусь і Расію для сваіх карпаратыўных кліентаў. Пра гэта паведамляе Myfin.by са спасылкай на агенцтва Nikkei Asia.
Як паведамляецца, HSBC, што базуецца ў Лондане і з’яўляецца найбуйнейшым еўрапейскім банкам па сукупных актывах, а таксама ўваходзіць у топ-10 па гэтым паказчыку ў свеце, яшчэ ў мінулым месяцы накіравала паведамленні сваім бізнес-кліентам пра тое, што з 27 кастрычніка яна больш не будзе абслугоўваць камерцыйныя плацяжы ў абедзве краіны праз «усё складанейшую нарматыўна-прававую сітуацыю».
У разасланых кампаніяй лістах гаварылася, што гэтае рашэнне было прынятае з мэтай «мінімізацыі аперацыйнай нагрузкі на Расію і Беларусь нават у тых выпадках, калі такая дзейнасць дазволеная дзейным заканадаўствам і нарматыўнымі актамі».
Прадстаўнікі HSBC у каментары Nikkei Asia заявілі, што група па-ранейшаму разлічвае завяршыць продаж свайго расійскага бізнесу мясцоваму крэдытору Expobank у 2023 годзе, аднак угода ўсё яшчэ чакае ўхвалы мясцовых рэгулятарных органаў — пры гэтым, паводле іх словаў, новыя абмежаванні на грашовыя пераводы не звязаныя з блізкай перадачай актываў.
Чытайце таксама
