У Беларусі застанецца столькі вагнераўцаў, колькі трэба. Пра гэта Аляксандр Лукашэнка заявіў падчас размовы з журналістамі, паведамляе яго прэс-служба.
«„Вагнер“ жыў, „Вагнер“ жыве і „Вагнер“ будзе жыць у Беларусі, як бы камусьці гэтага ні не хацелася. Мы яшчэ з Прыгожыным выбудавалі сістэму, як будзе ў нас размяшчацца ПВК Вагнера. І гэтыя здымачкі з космасу, што мы нешта дэмантуем… Чаму мы лішнія палаткі прыбіраем — столькі не трэба. Тут застаецца ядро, хтосьці з’ехаў у адпачынак, хтосьці наогул вырашыў жыць убаку, але тэлефоны, адрасы, паролі, яўкі ў гэтым ядры вядомыя. Цягам некалькіх дзён усе будуць тут, да 10 тысяч чалавек. Цяпер няма неабходнасці іх тут трымаць. Таму нікуды яны не бягуць. Столькі, колькі нам трэба і гэтаму падраздзяленню, яны будуць у нас жыць і працаваць», — адзначыў Лукашэнка.
«І, дарэчы, яны нам за ўсё плацяць: і за палатку, і за ваду. І потым. Жывуць яны ў палатках, мы ім яшчэ казарму рамантуем. Гэта было маё патрабаванне. Яны ў палатках не збіраліся жыць. Яны заўсёды жылі ў зямлянках. Я кажу: „Калі ласка, хлопцы. Мы вам дапаможам выкапаць, калі вы хочаце. Але навошта? Можна цывілізавана жыць“. І яны пагадзіліся. Беларусь жа не Афрыка і не Украіна, дзе яны былі на фронце», — дадаў палітык.
Лукашэнка таксама адказаў на пытанне, ці не баяцца ўлады трымаць у краіне такіх падрыхтаваных у ваенным плане байцоў. «А навошта нам іншыя? Я не сяджу на парахавой бочцы. Шчыра вам кажу: няма такога настрою ні ў кога», — заявіў Лукашэнка.
Паводле яго словаў, і беларускія вайскоўцы з задавальненнем пераймаюць досвед у вагнераўцаў, асабліва ўнутраныя войскі і спецыяльныя падраздзяленні. «Адрынання няма, вось што мяне здзівіла. Нашы вайскоўцы губу не раскаталі. Усякае можа быць, таму ўбіраюць усё, — сказаў Лукашэнка. — Я баяўся (чытаў жа вашыя і вашых калегаў пісанні): гэта зэкі, гэта такія, гэта сякія. Слухайце, праз дарогу бабулю перавядуць, у краме рэшты не бяруць. Дзіўныя людзі. Жалезная дысцыпліна. Ваўкоў баяцца — у лес не хадзіць. Мы ж іх трымаем не дзеля задавальнення тут, а дзеля карысці. І сістэму ж выбудавалі так, каб усё было пад кантролем».
Нагадаем, раней «Радыё Свабода» апублікавала спадарожнікавыя здымкі ад 1 і 23 жніўня — на іх відаць, што ў паўночнай, заходняй і цэнтральнай частках лагера вагнераўцаў у Беларусі прыбралі 101 намёт з 273.
Кіраўнік інфармацыйна-аналітычнай установы «Круглы стол дэмакратычных сіл» Юрый Васкрасенскі заявіў, што ўсе дамоўленасці адносна навучання беларускіх вайскоўцаў наймітамі ПВК Вагнера застаюцца ў сіле.
«Паводле папярэдніх звестак, усе байцы знаходзяцца ў месцах іх дыслакацыі. Дамоўленасць ёсць, акрамя таго, перасоўванне апошнім часам, якое прынялі за згортванне лагера, — толькі тактычная перадыслакацыя з мэтай заняцця больш выгадных пазіцый. То-бок разбор намётавага лагера, які сапраўды мае месца быць, звязаны выключна з жаданнем быць па-за сродкамі аб’ектыўнага кантролю патэнцыйнага праціўніка», — сказаў ён.