Журналістка французскага навінавага агенцтва Associated France Presse Барбара Ваязер пацікавілася ў Аляксандра Лукашэнкі, ці правільна ён зрабіў, падзяліўшыся з Расіяй часткай беларускага суверэнітэту, каб застацца ва ўладзе. Ён назваў пытанне «дурным», але адказаў.
Тэму суверэнітэту Беларусі на сустрэчы Лукашэнкі з журналістамі замежных СМІ паднялі ў сувязі з размяшчэннем у краіне расійскіх войскаў і зброі.
— Я мог бы ў вас спытаць: а які суверэнітэт я камусьці аддаў? Каму я аддаў частку суверэнітэту, каб застацца ва ўладзе? Я застаўся ва ўладзе дзякуючы свайму народу. У тым ліку дзякуючы беларускім журналістам, якія тут знаходзяцца. Яны — прапагандысты і агітатары ўсяго найлепшага, што ў нас ёсць у краіне. Толькі дзякуючы гэтаму я знаходжуся ва ўладзе, — лічыць Лукашэнка.
Ён таксама расказаў, чым будзе займацца, калі пойдзе «на супакой». Праўда не ўдакладніў калі.
— Я думаю, што будзе далей, што будзе пасля мяне. Але калі я буду жывы пасля прэзідэнцкага тэрміну, я буду ісці гэтым шляхам і змагацца за суверэнную і незалежную Беларусь, — упэўнены Лукашэнка.
Адказваючы на пытанне пра ўдзел у прэзідэнцкіх выбарах у 2025 годзе, Лукашэнка сказаў, што пакуль «абсалютна нічога не планаваў».
Нагадаем, на прэзідэнцкіх выбарах 2020 года, на думку праваабаронцаў і міжнароднай супольнасці, выбарчы працэс прайшоў са шматлікімі парушэннямі і быў абсалютна непразрыстым. Паводле афіцыйных вынікаў, Лукашэнка набраў 80,1% галасоў, а Святлана Ціханоўская — 10,12%.
Між тым эксперты незалежнай платформы «Голас» прааналізавалі звесткі пратаколаў выбарчых участкаў і звесткі, дасланыя карыстальнікамі платформы, і прыйшлі да высновы, што за Ціханоўскую прагаласавала не менш за тры мільёны чалавек, або 56% выбаршчыкаў з улікам рэальнай яўкі.
10 верасня 2020 года Сейм Літвы прыняў рэзалюцыю, у якой прызнаў Святлану Ціханоўскую абраным прэзідэнтам Беларусі, а яе і Каардынацыйную раду — адзінымі законнымі прадстаўнікамі краіны.
Тым не менш на ўзроўні Еўрасаюза палітык не была прызнаная абраным прэзідэнтам: афіцыйны прадстаўнік знешнепалітычнай службы ЕС Петэр Стана патлумачыў гэта тым, што выбары не былі сумленнымі і не адпавядалі міжнародным стандартам.
Чытайце таксама
