У Беларусі змянілі закон «Аб парадку выезду з Рэспублікі Беларусь і ўезду ў Рэспубліку Беларусь грамадзян Рэспублікі Беларусь». У яго ўнесеныя папраўкі, якія былі апублікаваныя сёння, 16 траўня, на Нацыянальным прававым інтэрнэт-партале. Дакумент атрымаў статус закона. А мы расказваем, каму абмежавалі выезд за мяжу.
Забарона для «палітычных адміністратыўшчыкаў» і з дазволу КДБ
КДБ зможа абмежаваць выезд не толькі тым, хто знаходзіцца на прафілактычным уліку ў органах дзяржаўнай бяспекі, але і тым, чый «выезд супярэчыць інтарэсам нацыянальнай бяспекі Рэспублікі Беларусь». Забарона можа ўводзіцца на тэрмін да паўгода. Якія грамадзяне і на якіх падставах будуць трапляць у гэтую катэгорыю — не паведамляецца.
Выезд таксама забароняць асобам, «у дачыненні да якіх вядзецца адміністрацыйны працэс за ўчыненне адміністрацыйных правапарушэнняў супраць парадку кіравання, — у мэтах забяспечання выканання пастановы суддзі пра накладанне адміністрацыйнага спагнання ў выглядзе штрафу».
Раней даўжнікоў з Беларусі таксама не выпускалі, але гэта датычыла тых, хто ўжо атрымаў штраф і не аплаціў яго. Цяпер жа выезд будзе забаронены і тым, у дачыненні да каго вядзецца адміністрацыйны працэс, а рашэння суд пакуль яшчэ не прыняў.
У «правапарушэнні супраць парадку кіравання» ўваходзяць так добра знаёмыя беларусам «палітычныя» артыкулы КаАП: непадпарадкаванне законнаму распараджэнню або патрабаванню службовай асобы падчас выканання ёю службовых паўнамоцтваў, парушэнне парадку арганізацыі або правядзення масавых мерапрыемстваў і гэтак далей.
Забарона для сілавікоў
Найвышэйшыя чыноўнікі змогуць выехаць за мяжу толькі пасля ўзгаднення з Аляксандрам Лукашэнкам. А менавіта:
- старшыні абласных і Мінскага гарадскога выканаўчых камітэтаў;
- начальнік Службы бяспекі прэзідэнта Рэспублікі Беларусь;
- начальнік Аператыўна-аналітычнага цэнтра пры прэзідэнце Рэспублікі Беларусь;
- старшыня Камітэта дзяржаўнай бяспекі,
- міністр унутраных справаў;
- міністр замежных справаў;
- міністр абароны;
- міністр па надзвычайных сітуацыях;
- старшыня Дзяржаўнага памежнага камітэта;
- старшыня Дзяржаўнага мытнага камітэта;
- старшыня Следчага камітэта;
- старшыня Дзяржаўнага камітэта судовых экспертыз;
- начальнік Дзяржаўнай інспекцыі аховы жывёльнага і расліннага свету.
Выезд з Беларусі «кіраўнікоў дзяржаўных органаў, а таксама кіраўнікоў дзяржаўных арганізацый і работнікаў, якія ажыццяўляюць забяспечанне дзейнасці і тэхнічнае абслугоўванне дзяржаўных органаў, якім дадзены допуск да дзяржаўных сакрэтаў», будзе вызначацца ўрадам.
У гэтым законе гаворыцца, што выезд за мяжу сілавікоў будзе «вызначацца лакальным прававым актам» адпаведных ведамстваў. Імаверна, у іх будзе замацаваная норма «па ўзгадненні з кіраўніцтвам». Гэта закране вайскоўцаў, супрацоўнікаў, работнікаў і асобаў цывільнага персаналу вайсковых фарміраванняў і ваенізаваных арганізацый Беларусі, а менавіта:
- Узброеных сіл Рэспублікі Беларусь;
- органаў памежнай службы;
- унутраных войскаў Міністэрства ўнутраных справаў;
- органаў дзяржаўнай бяспекі;
- транспартных войскаў;
- Службы бяспекі прэзідэнта Рэспублікі Беларусь;
- Аператыўна-аналітычнага цэнтра пры прэзідэнце Рэспублікі Беларусь;
- органаў фінансавых расследаванняў Камітэта дзяржаўнага кантролю;
- Следчага камітэта;
- Дзяржаўнага камітэта судовых экспертыз;
- органаў унутраных справаў;
- органаў і падраздзяленняў па надзвычайных сітуацыях;
- Дзяржаўнай інспекцыі аховы жывёльнага і расліннага свету пры прэзідэнце Рэспублікі Беларусь;
- Дзяржаўнай фельд’егерскай службы пры Міністэрстве сувязі і інфарматызацыі.
У законе таксама адзначана, што ім могуць адмовіць у выездзе з краіны «ў мэтах забяспечання інтарэсаў нацыянальнай бяспекі да спынення абставінаў, якія перашкаджаюць іх выезду».
Акрамя таго, у выпадку наяўнасці ў гэтай катэгорыі асобаў біяметрычнага пашпарта на час службы яны абавязаныя перадаць яго ў кадравую службу сваёй арганізацыі.
І калі ўводзяцца гэтыя забароны?
Абмежаванні на выезд для чыноўнікаў і сілавікоў набудуць моц праз шэсць месяцаў пасля афіцыйнага апублікавання гэтага закона.
Іншыя палажэнні — пасля афіцыйнага апублікавання гэтага закона.
Нагадаем, законапраект паступіў у парламент летам мінулага года. Дакумент быў прыняты ў першым чытанні Палатай прадстаўнікоў у кастрычніку мінулага года, а ў другім чытанні — у красавіку гэтага года. Пры гэтым у яго ўносілі праўкі: напрыклад, у спіс тых сілавікоў, каму могуць адмовіць у выездзе за мяжу, унеслі егераў.
Законапраект ухвалілі ў Савеце Рэспублікі, а пасля яго падпісаў Аляксандр Лукашэнка.
