Мікраскапічныя часцінкі пластыку пранікаюць у мозг і могуць назапашвацца ў тканках, а іх узровень расце з кожным годам. Канадскія навукоўцы высветлілі, што адна простая звычка можа знізіць уздзеянне мікрапластыкаў на арганізм на 90%, піша Daily Mail.
Штодзённае піццё бутыляванай вады можа значна падняць узровень таксічных мікрапластыкаў у арганізме, папярэджваюць навукоўцы з Канады. Паводле іх дадзеных, пераход на фільтраваную водаправодную ваду здольны скараціць колькасць пластыкавых часцінак, якія трапляюць у арганізм, з 90 000 да 4000 за год.
Даследаванне, апублікаванае ў часопісе Brain Medicine, з’явілася пасля таго, як навукоўцы выявілі да сямі грамаў пластыку ў чалавечым мозгу. Гэта прыкладна столькі ж, колькі патрабуецца для вытворчасці невялікай лыжкі.
Акрамя таго, амерыканскія даследчыкі з Універсітэта Нью-Мексіка выявілі, што канцэнтрацыя мікрапластыкаў у мозгу людзей, якія памерлі ў 2024 годзе, на 50% вышэйшая, чым у тых, хто памёр у 2016 годзе. Асабліва высокія ўзроўні былі зафіксаваныя ў пацыентаў з дэменцыяй, што можа паказваць на патэнцыйную сувязь паміж забруджаннем арганізма пластыкам і кагнітыўнымі разладамі.
Нябачныя воку мікрапластыкі — гэта драбнюткія часцінкі памерам усяго некалькі мікраметраў. Яны ўтвараюцца ў працэсе раскладання пластыку і трапляюць у паветра, ваду і прадукты харчавання. З часам яны назапашваюцца ў арганізме, пранікаючы нават праз гематаэнцэфалічны бар’ер — ахоўную сістэму, якая абараняе мозг ад шкодных рэчываў.
Даследчыкі прапануюць некалькі простых спосабаў паменшыць ўздзеянне мікрапластыкаў:
- Адмовіцца ад бутыляванай вады. Паводле доктара Брэндана Лу з Універсітэта Таронта, пераход на фільтраваныя ваду з-пад крана — адзін з самых эфектыўных крокаў.
- Не разаграваць ежу ў пластыкавых кантэйнерах. Асабліва небяспечна выкарыстоўваць пластык у мікрахвалёўцы, бо гэта спрыяе вызваленню мікрачасцінак.
- Выкарыстоўваць шкляны або сталёвы посуд для захоўвання прадуктаў.
- Пазбягаць пластыкавых чайных пакецікаў. Даследаванні паказалі, што адна порцыя чаю з такога пакеціка можа вызваліць мільярды часцінак пластыку ў напой.