У расійскім Камсамольску-на-Амуры на выставе трафейнай тэхнікі NATO і УСУ загінула чатырохгадовае дзіця, паведамляюць мясцовыя СМІ. Задні люк амерыканскага бронетранспарцёра М113 праламаў яму галаву, піша праект «Вот Так».
Здарэнне адбылося раніцай 26 красавіка. Відавочцы расказваюць, што дзеці разглядалі вайсковую тэхніку — адно з іх атрымала чэрапна-мазгавую траўму ад люка бронетранспарцёра, які раптам адкрыўся. Дактары спрабавалі выратаваць дзіця, але не змаглі.
Мясцовыя СМІ прыводзяць дзве версіі падзей. Паводле адной з іх, люк адкрыўся праз тое, што хтосьці тузануў за рычаг унутры М113. Паводле іншай версіі, люк прыйшоў у рух сам праз праблемы з гідраўлічнай сістэмай бронетранспарцёра.
Выстава з трафейнай заходняй тэхнікай адкрылася 25 красавіка на Тэатральнай плошчы ў Камсамольску-на-Амуры. Прэзентавалі яе гараджанам кіраўнік горада і сябра партыі «Адзіная Расія» Дзмітрый Заплутаеў і старшыня гарадской Думы Наталля Свінарова. Яны расказалі пра «ўклад ва ўмацаванне патрыятычнага духу нашых грамадзян, асабліва маладога пакалення». Першапачаткова планавалася, што выстава будзе працаваць да 3 траўня.
Тэхніка, якая трапіла на выставу ў Камсамольску-на-Амуры, была захопленая групоўкай «Усход». Усяго на выставе прадстаўленыя сем розных адзінак браняванай тэхнікі: машына FV140 Samaritan, медыцынскі аўтамабіль M1152 HMMWV, цяжкая бронемашына Cougar, два бронетранспарцёры International MaxxPro, а таксама бронетранспарцёры M 113 і БТР-4 «Буцэфал».
Цяпер выстава ачэпленая паліцыяй, на яе тэрыторыі працуюць экстранныя службы.