У Расіі затрымалі двух махляроў, якія «развялі» Ларысу Доліну, паведаміў набліжаны да сілавікоў тэлеграм-канал SHOT.
Усяго ў афёры ўдзельнічалі дзевяць чалавек. Насуперак першапачатковым заявам пацярпелай, што «ашуканцы знаходзяцца на тэрыторыі Украіны», усе фігуранты справы — расіяне.
Асноўнымі ўдзельнікамі схемы называюць 43-гадовага Дзмітрыя Лявонцьева з Яшкар-Алы і 20-гадовага Андрэя Аснова з Тальяці. Як піша SHOT, яны адказвалі за банкаўскія карткі для пераводаў і сім-карткі для перамоваў паміж удзельнікамі арганізаванай групы. Пазней менавіта яны перавялі ў наяўныя частку сродкаў — свой «ганарар».
Цяпер з Лявонцьева і Аснова будуць спаганяць на карысць спявачкі 69 млн рублёў (672 тысячы даляраў паводле курсу на 17 студзеня).
Іншы пракрамлёўскі тэлеграм-канал, Mash, сцвярджае, што расіяне — удзельнікі схемы былі «дропамі», якія толькі прадалі зламыснікам дадзеныя сваіх банкаўскіх картак. Арганізатары ж афёры, паводле звестак выдання, знаходзяцца ва Украіне.
«Усяго па справе можа ўсплыць больш за 40 падазраваных. Усё гэта — падстаўныя асобы, якім пераводзілася ад 2 да 3 млн рублёў (ад 19,5 да 29,3 тысячы даляраў. — Заўв. рэд.) з выкрадзеных грошай. Усяго 120 мільёнаў рублёў (амаль 1,2 млн даляраў. — Заўв. рэд.). Людзі раскіданыя па ўсёй краіне — ад Масквы да Далёкага Усходу», — піша Mash.
Нагадаем, летам мінулага года ў Instagram Долінай з’явілася паведамленне пра тое, што яна прадала сваю кватэру за 112 мільёнаў расійскіх рублёў (больш за 1,2 млн даляраў), а таксама заклала лецішча за 50 мільёнаў рублёў (блізу 550 тысяч даляраў), каб перавесці грошы ўкраінскай брыгадзе «Азоў». Заканчваўся пост словамі пра тое, што рэшту жыцця Доліна хоча пражыць у Адэсе. Цяпер пост выдалены.
Паводле інфармацыі SHOT, спявачка аддала зламыснікам больш за 100 млн расійскіх рублёў (1,075 млн даляраў).
Нагадаем, ураджэнка Адэсы (Украіна) Ларыса Доліна неаднаразова выказвалася ў падтрымку анексіі Крыма і поўнамаштабнай расійскай агрэсіі супраць Украіны. У студзені мінулага года Украіна ўключыла спявачку ў санкцыйны спіс «за наведванне акупаваных тэрыторый пасля пачатку ўварвання, удзел у прапагандысцкіх канцэртах, публічную падтрымку вайны і рэжыму Пуціна».
3 лютага 2023 года Доліну ўключылі ў санкцыйны спіс Канады за датычнасць да распаўсюду расійскай дэзінфармацыі і прапаганды.