У лесе недалёка ад польскага Бельск-Падляскага паліцэйскія затрымалі 27-гадовага беларуса. Пра яго паведаміла мясцовая жыхарка — яе спалохала, што мужчына развёў у лесе агонь, а ад гэтага можа пачацца лясны пажар. Прыехаўшы на месца, паліцэйскія знайшлі адразу пяць падставаў выставіць беларусу абвінавачанні. Пра незвычайны выпадак расказалі у паліцыі Бельск-Падляскага, піша MOST.
На той момант як паліцыя даехала да лесу, беларус паспеў патушыць агонь, але не прыбраў наступствы «пікніку» — вакол валяліся пластыкавыя бутэлькі. Убачыўшы паліцэйскіх, мужчына паспрабаваў уцячы — сеў у сваю машыну і хацеў з’ехаць. Патрабаванне паліцэйскіх спыніцца ён праігнараваў.
Мужчыну ўсё ж удалося затрымаць. Паліцыя спрабавала высветліць яго асобу, але пры ім не аказалася ні пашпарта, ні нават правоў кіроўцы. Ён растлумачыў, што ехаў у Варшаву, але па дарозе спыніўся, каб адпачыць і паесці.
У выніку беларусу выставілі абвінавачанні ў развядзенні вогнішча ў неналежным месцы, забруджанне лесу, непадпарадкаванні паліцыі, кіраванні аўтамабіля без правоў і адсутнасці пашпарта.
Суд прызначыў яму 15 сутак арышту.