Ноччу ў Калодзішчах быў чуваць гук выбуху. Пра гэта паведамляе тэлеграм-канал «МотолькоПомоги». Чытачы «Люстэрка» пішуць, што цяпер апытваюць жыхароў Вайсковага Гарадка ва Уруччы — паводле следчага, уначы адбыўся тэракт на чыгуначнай станцыі Азярышча.
Першым пра імаверны выбух увечары 5 кастрычніка паведаміў тэлеграм-канал «Посмотри, брехня?» — пра яго напісалі жыхары Калодзішчаў у Мінскім раёне.
Сёння раніцай, 6 кастрычніка, тэлеграм-канал «МотолькоПомоги» напісаў, што інфармацыя пацверджаная — выбух быў чуваць каля 23.20 у Калодзішчах у раёне радыёцэнтра, паводле іншай інфармацыі — у раёне чыгуначных шляхоў. Пазней у гэтым раёне бачылі машыны МНС.
«Таксама высветлілася, што гук выбуху быў чуваць нават у Мінску, у прыватнасці ва Уруччы і Зялёным Лузе. Гэта значыць, што гукавая хваля была ў радыусе 8 км. Што менавіта гэта было, пакуль невядома», — напісалі ў тэлеграм-канале.
У рэдакцыю «Люстэрка» таксама напісалі жыхары Вайсковага Гарадка. З іх словаў, прыкладна ў 23.15 у іх дамах «прайшла хваля, што ў доме затрэсліся вокны і ложак». А раніцай 6 кастрычніка сілавікі пачалі праводзіць апытанне мясцовых жыхароў, якім паведамілі, што «быў тэракт на станцыі Азярышча, узарвалі чыгунку».
Гэтая тэма таксама актыўна абмяркоўваецца ў чатах жыхароў Калодзішчаў — людзі пішуць, што выбухаў вечарам было два, яны таксама паведамляюць пра тое, што да раніцы на дарогах дзяжурылі сілавікі, а цяпер ідуць апытанні.
Супольнасць беларускіх чыгуначнікаў таксама паведаміла пра выбух.
«Паводле папярэдняй і пакуль неверыфікаванай інфармацыі, пашкоджаны ўчастак чыгуначнага палатна і стрэлачнага пераводу, якія злучаюць станцыйныя шляхі з пагрузачна-разгрузачнымі ў месцы знаходжання грузавых рампаў. Гэтыя інжынерныя збудаванні на названай станцыі перыядычна задзейнічаюцца для выканання пагрузачна-разгрузачных аперацый з ваеннай тэхнікай», — расказалі чыгуначнікі.
Азярышча — асноўная станцыя, на якой ажыццяўляецца пагрузка ваеннай тэхнікі ў раёне Мінска. Побач са станцыяй размешчаныя 120-я механізаваная брыгада і 127-я брыгада сувязі, а таксама 56-ы полк сувязі.
Адзначым, што МНС, МУС або СК нічога не паведамлялі пра такое здарэнне, гэтак жа як і Беларуская чыгунка.