Сілавікі выклалі «пакаяльнае» відэа з мужам палітзняволенай Кацярыны Андрэевай — журналістам Ігарам Ільяшом. Раніцай яго фота ў кайданках апублікаваў набліжаны да ГУБАЗіК тэлеграм-канал.
У «пакаяльным» відэа Ігар Ільяш кажа, што з траўня 2017-га да ліпеня 2021 года быў супрацоўнікам тэлеканала «Белсат», пасля гэтага стаў журналістам-фрылансерам.
На камеру журналіст гаворыць, што «цягам усіх гэтых гадоў неаднаразова даваў інтэрв'ю розным медыя», сярод якіх былі рэсурсы, «у той ці іншы час» прызнаныя ў Беларусі «экстрэмісцкімі фарміраваннямі». Яго таксама змусілі сказаць, што ён даваў каментары замежным, у тым ліку ўкраінскім, СМІ.
Паводле версіі сілавікоў, Ільяш «займаўся спрыяннем экстрэмісцкім фарміраванням і зборам звестак для замежных разведак».
Не паведамляецца, ці выстаўленыя яму якія-небудзь абвінавачванні.
Ігар Ільяш — журналіст і муж журналісткі Кацярыны Бахвалавай (Андрэевай), якая знаходзіцца ў калоніі. У суаўтарстве з ёй ён напісаў кнігу «Беларускі Данбас» (у сакавіку 2021 года суд уключыў яе ў Рэспубліканскі спіс экстрэмісцкіх матэрыялаў), у якой расказваецца пра беларусаў, якія ўдзельнічалі ў вайне на Данбасе як з боку Украіны, так і з боку Расіі.
У лістападзе 2020 года Ільяшу прызначылі 15 сутак адміністрацыйнага арышту за ўдзел у пікетаванні. 16 ліпеня 2021 года ён быў затрыманы падчас масавых ператрусаў у незалежных журналістаў у Мінску і іншых гарадах Беларусі. У кватэры журналіста правялі ператрус, забралі тэхніку і кнігі, а потым яго змясцілі ў ізалятар часовага ўтрымання. Пасля 15 сутак арышту ён выйшаў на волю.
Кацярына Андрэева працавала журналісткай на тэлеканале «Белсат». Яе затрымалі ў лістападзе 2020 года падчас стрыму з «плошчы Перамен», дзе сілавікі жорстка разганялі пратэстоўцаў. Суд асудзіў яе на два гады пазбаўлення волі, аднак потым на яе завялі новую крымінальную справу — пра здраду дзяржаве. Працэс быў закрытым. З улікам папярэдняга тэрміну яна атрымала 8 гадоў і 3 месяцы пазбаўлення волі. Яна знаходзіцца ў гомельскай ПК № 4. МУС уключыла палітзняволеную ў спіс «экстрэмістаў».
Чытайце таксама
