У аэрапорце Мінска на мінулых выходных прызямліліся адразу чатыры самалёты Airbus. Усе яны належаць авіякампаніі Magic Air з Гамбіі, пра якую практычна нічога не вядома, піша расійскі тэлеграм-канал «Авиаторшина». А нямецкае выданне Focus выказвае здагадку, што гэта фірма-пракладка, праз якую Расія абыходзіць санкцыі.
Канал «Авиаторшина» звярнуў увагу на звесткі сэрвісу Flightradar24, згодна з якімі 17 жніўня ў Мінску ў розны час прызямліліся адразу тры самалёты Airbus A330−243 і адзін Airbus A320−200. Яны вылецелі з егіпецкага Каіра, аманскага Маската і турэцкага Стамбула, дзе былі на захоўванні працяглы час.
Апошнім аператарам усіх чатырох бартоў, паводле парталаў Planespotters і Airfleets, была авіякампанія Magic Air з Гамбіі. Да яе яны трапілі ў кастрычніку-снежні 2023 года і сталі для яе першымі і адзінымі самалётамі. Да гэтага паветраныя судны адносіліся да ліванскай авіятранспартнай кампаніі Lebanon Sky Aviation, а раней змянілі яшчэ некалькі ўладальнікаў.
Пра гамбійскую авіякампанію Magic Air асабліва нічога не вядома — яна нават не вядзе ніякай дзейнасці. Сайт перавозчыка таксама нічога не паведамляе пра яго гісторыю, уладальнікаў ці планы.
Вядома толькі, што ў кампаніі чатыры самалёты — то-бок у Мінск яна перавезла ўвесь свой авіяфлот. Свой першы самалёт Magic Air атрымала ў кастрычніку 2023 года — гэта быў 19-гадовы Airbus A320 з серыйным нумарам 2600. За ім у лістападзе таго ж года пайшлі тры самалёты Airbus A330−200 ва ўзросце прыкладна 21 года.
Высокая імавернасць таго, што ўсе чатыры самалёты Airbus пазней будуць перапраўленыя з Беларусі ў Расію. Такім чынам, загадкавая гамбійская авіякампанія, відаць, служыць пракладкай, якая дапамагае РФ абыходзіць санкцыі, піша Focus.
Выданне нагадвае, што пастаўкі заходніх самалётаў расійскім авіякампаніям фактычна забароненыя. Тым не менш нядаўна ў Расію праз Маскат прыбыў самалёт Airbus A320 Neo з VIP-салонам.