Стала вядома, колькі шэнгенскіх віз атрымалі беларусы за мінулы год. Іх колькасць вырасла, і вось у якіх краін адмоваў менш за ўсё

Колькасць шэнгенскіх віз, выдадзеных беларусам, у 2023 годзе зноў пачала патроху расці пасля рэзкага падзення апошніх гадоў. Пры гэтым практычна ўсе візы выдалі ўсяго пяць краін ЕС. Пра гэта сведчаць дадзеныя, апублікаваныя Еўракамісіяй.

Паспорт с шенгенской визой. Фото: «Зеркало» — Пашпарт з шэнгенскай візай. Фота: «Люстэрка»

За мінулы год беларусы падалі амаль 164 тысячы заявак на кароткатэрміновыя шэнгенскія візы — маюцца на ўвазе візы тыпу C, турыстычныя і іншыя: яны дазваляюць знаходзіцца на тэрыторыі краін Шэнгена да 90 дзён у паўгоддзі, але не жыць, вучыцца альбо працаваць, у адрозненне ад нацыянальных віз. Візы тыпу С могуць выдавацца для разавай паездкі або шматразовага ўезду.

Выдадзеных віз было ненашмат менш, чым заявак, — 158 тысяч. Адмовамі завяршыліся 5,5 тыс. запытаў беларусаў. Працэнт адмоваў склаў усяго 3,4%, аднак, як паведамлялася раней, гэта амаль удвая вышэй, чым у папярэднія гады.

Большасць віз — шматразовыя: 138 тысяч, або 87,3%. Самай актыўнай у выдачы віз была Германія, за ёю ідуць Італія, Польшча, Венгрыя і Францыя. Менавіта гэтыя краіны аформілі практычна ўсе візы, атрыманыя беларусамі. Ніжэй — зводная табліца па краінах, дадзеныя якіх прадстаўленыя ў выкладках Еўракамісіі.

Краіна	Выдадзена віз	Шматразовыя	Адмовы
Германія	51,9 тыс.	95,7%	0,8%
Італія	40,2 тыс.	85,4%	0,2%
Польшча (консульствы ў Мінску, Брэсце, Гродне)	31,4 тыс.	87,2% у Мінску, 90,7% у Брэсце, 91,7% у Гродне	10% у Мінску, 12% у Брэсце, 13,3% у Гродне
Венгрыя	14,4 тыс.	73,1%	1,5%
Францыя	11,8 тыс.	67,1%	2,3%
Эстонія	1473	93,5%	8,8%
Латвія	1184	78%	11,4%
Славакія	931	53,6%	1,2%

А колькі віз было ў мінулыя гады?

Хаця колькасць шэнгенскіх віз, выдадзеных беларусам, у 2023 годзе ўсё яшчэ заставалася невялікай, яна вырасла ў параўнанні з папярэднімі гадамі. Рэзкае падзенне пачалося ў 2020-м праз пандэмію каранавіруса і потым працягнулася ў 2022-м праз розныя візавыя абмежаванні, якія краіны Еўропы наклалі на Беларусь у сувязі з яе датычнасцю да вайны супраць Украіны.

Тым не менш цяперашняму ўзроўню выдачы віз пакуль вельмі далёка да таго, які быў у канцы 2010-х.

Параўноўваем шэнгенскія візы, атрыманыя беларусамі ў 2023 годзе, з папярэднім дзесяцігоддзем:

2023 — 158 тысяч;
2022 — 118,5 тысячы;
2021 — 57,5 тысячы;
2020 — 135 тысяч;
2019 — 643,5 тысячы;
2018 — 677 тысяч;
2017 — 710,5 тысячы;
2016 — 693,5 тысячы;
2015 — 754 тысячы;
2014 — 880 тысяч;
2013 — 768 тысяч.

Чытайце таксама

Изображение носит иллюстративный характер. Фото: zerkalo.io — «Няма намераў абмежаваць беларусаў у атрыманні віз». У МЗС Польшчы расказалі пра лёс праграмы PBH і прычыны адмоваў у візе

«Зеркало»

Распечатано с портала ZERKALO.IO